Boðið er upp á tónlistarnámskeið fyrir leikskólabörn. Annarsvegar er um að ræða tónleika sem fara fram í leikskólum og taka 30-40 mínútur í flutningi og miðast við eina heimsókn flytjenda með virkri þátttöku áheyrenda.

Hinsvegar eru skapandi tónsmíðaverkefni sem spanna 3 - 10 vikna tímabil þar sem börnin vinna úr ákveðnum hljóðheimi, æfa lög, leysa verkefni eða búa til sín egin tónverk. Leiðbeinandi heimsækir börnin reglulega og endar verkefnið með tónleikum og/eða útgáfu geisladisks.
Öll nánari útfærsla er í samráði leiðbeinanda og viðkomandi leikskóla. Á vorönn vann Margrét Sigurðardóttir söngkona og tónsmiður verkefni sem tókst mjög vel fyrir Leikskólann Vesturborg. Margrét verður ásamt fleirum í leikskólaverkefnum Tóneyjar, veturinn 2009 -2010.

Áhugasamir geta fengið nánari upplýsingar með því að senda tölvupóst á netfang Tóneyjar, eða í síma 551 3888.

Frá Tóney eru þróuð námskeið sem fara fram í grunnskólum í samstarfi við skólastjórnendur og kennara grunnskólanna. Þetta eru námskeið sem koma beint inn í tónmenntakennslu hvers skóla, sjálfstæðar einingar tvinnaðar inn í stundatöflu skóla og unnar af fagfólki í tónlist. Námskrá grunnskóla er höfð til hliðsjónar.

Hver leiðbeinandi setur sinn ramma og eru markmiðin mismunandi; "Skapandi tónlistarnám" þar sem þátttakendur nálgast tónlistina fyrst og fremst í gegnum sköpun sinna eigin tónsmíða, tónlist og myndlist, taktur og tónlist, söngur og leikur og margt fleira. Hvert námskeið spannar nokkrar vikur og lýkur yfirleitt með tónleikum og/eða hljóðriti á geisladiski.

Leiðbeinendur Tóneyjar vinna alla jafna í nokkrum skólum í einu en kennarar fara á milli skólanna með sín einstöku námskeið. Þannig fær sérþekking fagfólks notið sín og auðgar það starf sem fyrir er, í nánu samstarfi við hvern skóla og þarfir hans. Áhersla skal lögð á að hér er um þróunarverkefni að ræða og því opið fyrir alla umræðu og hugmyndir.

Leiðbeinendur eru færustu hljóðfæraleikarar, sérmenntaðir tónmenntakennarar og fólk með mikla reynslu af tónlistarstarfi með börnum. Ábyrgðamaður verkefnisins er Guðni Franzson en hann, eins og margir aðrir kennaranna er með opinber grunnskólakennararéttindi.

Tóney sér nú m.a. um tónmenntakennslu fyrir Sæmundarskóla, Langholtsskóla og Fellaskóla auk þess að hafa komið að kennslu í Korpuskóla, Landakotsskóla, Tjarnarskóla og víðar.

Kostnaður við tónmenntakennsluna veturinn 2009 -10 miðast við kr. 6.000 fyrir hverja kennslustund.

Fyrir utan tónmenntakennsluna hefur Tóney boðið upp á hljóðfæranámskeið í nokkrum grunnskólum, t.d. Sæmundarskóla, Hvassaleitisskóla og víðar. Þarna er um 12 vikna námskeið að ræða þar sem kennt er í litlum hópum, 3 - 6 í hópi, grunnatriði í rytmiskum hljóðfæraleik. Þessi námskeið eru styrkhæf frá Frístundakorti Reykjavíkurborgar.

Leiðbeinendur Tóneyjar hafa enn fremur komið að útfærslu "Músíkalsks pars" í Fellaskóla en þar er um samstarfsverkefni Tónlistarskóla Fíh og Fellaskóla að ræða. Þegar verkefnið hófst voru 2 - 3 nemendur að læra á hljóðfæri í skólanum en nú taka á þriðja hundrað nemendur Fellaskóla þátt í tónlistarþjálfun á einn eða annan hátt.

Tóney býður upp á margvísleg námskeið ætluð nemendum framhaldsskóla. Námskeiðin eru í fjórum megin flokkum:

Tónsmíðar; grunnatriði og úrvinnsla
Tækni tónlistar; tölvur og forrit
Tónlistarsaga; stefnur og straumar
"Opin eyru"; Meðvituð, fljölbreytt hlustun

Leiðbeinendur eru færasta tónlistarfólk, tónskáld og tónfræðingar sem koma til móts við óskir hvers skóla eða hóps nemenda.

Samstarf við tónlistar-, myndlistar- og aðra sérskóla
Tóneyjarhugmyndin hefur fallið í frjóan jarðveg hjá fagfólki í tónlist. Stjórnendur tónlistarskólanna hafa tekið henni vel og sýnt áhuga á að senda nemendur og kennara á sérstök námskeið sem raunhæfar er að halda á einum stað, frekar en í hverjum skóla fyrir sig. Nokkur slík námskeið hafa verið haldin og lukkast vel og verða þróuð á nýju ári. Einnig vann Tóney með Myndlistaskólanum í Reykjavík að verkefni Myndlist-tónlist og er gert ráð fyrir frekari þróun á því sviði.

Samstarf við tónlistarskóla á landsbyggðinni
Hugmynd um þróun nk. fjarkennslu er einn grunnþátturinn í starfi Tóneyjar. Sérkennarar, reyndir hljóðfæraleikarar eða fagmenn heimsækja ákveðin byggðalög í nokkra daga, 2 - 4 sinnum á ári. Þar vinna þeir með staðarkennurum að uppbyggingu námsefnis sem síðan er fylgt eftir af heimamönnum. Sérkennarinn kemur svo aftur og metur stöðu einstakra nemenda og leggur til hvað vinna skuli næsta misserið. Þegar sérkennari hefur farið í nokkur byggðalög er kominn grundvöllur fyrir hóptíma (t.d. langri helgi á Tóney). Þannig má leysa vanda þeirra byggða sem hafa t.d. misst fagkennara eftir langa búsetu og skilið eftir lengra komna nemendur. Einnig má fylla skörð í hljóðfærakennslu sem annars þyrfti að ráða til kennara í heils árs starf. Þetta fyrirkomulag auðveldar nemendum af landsbyggðinni að koma til höfuðborgarinnar til frekara framhaldsnáms.

Á liðnum árum og áratugum hefur orðið mikil breyting á starfsumhverfi tónlistarfólks. Hin hefðbundnu hljóðfæri standa vissulega fyrir sínu og þar gilda aldnar kenningar um æfinguna og meistarann, flest annað er breytingum undirorpið. Á Tóney er boðið upp á námskeið í margvíslegum fræði og tæknigreinum sem höfða til atvinnufólks í tónlist. Námskeið eru sett upp í samráði við umsækjendur og reynt að mæta óskum hvers og eins.
Nótnaskriftarnámskeið "Sibelius" eru vinsæl af kennurum, þjálfun í að hanna sérsniðið námsefni og eins grunn námskeið í upptökutækni "Pro Tools" fyrir hljóðfærakennara til að hljóðrita leik nemenda.

Líkamsrækt og þjálfun á Tóney er að stærstum hluta unnin útfrá kerfi Pilates. Lára Stefánsdóttir og Ástrós Gunnarsdóttir dansarar hafa umsjón með þessari starfsemi á Tóney.

Tóney hefur jafnframt fléttað dansnámskeið inn í námskeið grunnskólanna.

Tóney stendur fyrir opinberu tónleikahaldi og líklegt er að í framtíðinni muni Tóney einnig koma að útgáfu tónlistar. Um þennan þátt verður fjallað nánar hér á síðunni.