Boðið er uppá leiðsögn í grúski fornar tónlistar. Settir verða saman hópar sem hafa sérstök sameginleg áhugamál s.s. rímnalög, trúartónlist, frumstæð heimstónlist og fl., meðal leiðbeinenda verða Eggert Pálsson og Buzby Birchall.

Draumurinn er að á Tóney verði í framtíðinni starfrækt sérstök deild um endurreisnartónlist, bæði hljóðfæratónlist og söng.

Í farvatninu er deild um barokktónlist á Tóney. Gert er ráð fyrir hóp og einkatímum, þar sem tekin eru fyrir ákveðin hljóðfæri, stílar og tækni, ekki síst hugsað fyrir fólk með bakgrunn í tónlist og löngun í Barokk. Meðal þeirra sem koma að deildinni eru færasta tónlistarfólk á þessu sviði s.s. Guðrún Óskarsdóttir semballeikari, Halla Steinunn Stefánsdóttir fiðluleikari, Sigurður Halldórsson cellóleikari og margir fleiri.

Verið er að leggja drög að sérstakir deild fyrir heimstónlist á Tóney. Þar eru teknir fyrir straumar og stefnur í margvíslegri flóru heimstónlistar, s.s. tónlist Balkanskaga, Klezmertónlist, Keltnesk tónlist, tónlist frumbyggja Ástralíu, Afríku, Suður-Ameríku og fl. Meðal leiðbeinenda eru Eggert Pálsson, Buzby Birchall, Guðni Franzson og margir fleiri.

Leitast er við að opna dyr að helstu rýmum raf og tölvutónlistar á Tóney. Boðið er uppá námskeið í algengustu forritum, en einnig leitast við að aðstoða fólk á vegi til flóknari forrita, hljóðvinnslu og raftækni. Meðal leiðbeinenda verða Lars Graugaard, Hugi Guðmundsson, Áki Ásgeirsson, Jón Skuggi, Matthías M.D. Hemstock og fjölbreyttur hópur fyrirlesara.

Leitast er við að efla allt samspil og kammertónlist á Tóney og gert er ráð fyrir að bjóða uppá aðstöðu og stuðnig við samspil á breiðum grunni.
Í undirbúningi er stofnun lítillar hljómsveitar, Tóney Sinfóníetta.

Ný tónlist á öruggt athvarf á Tóney, tónsmíðar, tækni en ekki síst hljóðfæraleikur og flutningur nýrrar tónlistar. Caput hópurinn hefur aðsetur á Tóney en hópnum er skipað á bekk með betri flytjendum nýrrar tónlistar í Evrópu. Margir leiðbeinendur á Tóney eru meðlimir í Caput hópnum.

Á Tóney er lögð rækt við margvíslega stíla sönglistar, klassískan söng, leikhús-, dægur- og þjóðlagasöng. Kennt er í hópum og/eða einkatímum en leiðbeinendur eru færasta fagfólk á sínu sviði. Einnig eru starfræktir sönghópar á Tóney þar sem unnið er að ólíkum stílum og tegundum söngs.

Á Tóney er boðið uppá nám á flest hefðbundin hljóðfæri (sjá Tóney - allt árið), áherslur einstaklingsmiðaðar og reynt að rækta hæfileika hvers og eins. Námið er miðað við opinbera námskrá þar sem hún á við en einnig gert ráð fyrir fagvinnu utan hefðbundinnar stefnu.

Hverri önn líkur með tónleikum, hljóðriti eða öðru takmarki en einnig er hægt að taka hefðbundið próf samkvæmt námskrá og er þá kallaður til opinber prófdómari.

Á Tóney er lögð áhersla á fjölbreytt samspil, margvíslega hljóðfærahópa og ólíka stíla.